کوئٹہ: سیکیورٹی ذرائع کے مطابق بلوچستان میں سیکیورٹی فورسز نے مختلف کارروائیوں میں 11 دہشت گردوں کو ہلاک کردیا۔ یہ کارروائیاں آپریشن ردالفساد 3 کے تحت پنجگور اور چاغی کے اضلاع میں فتنہ الہند سے وابستہ عسکریت پسندوں کے خلاف کی گئیں۔ سیکیورٹی ذرائع کے مطابق پنجگور کے علاقے گوارگو میں آپریشن کے دوران 5 دہشت گرد مارے گئے۔ چاغی کے علاقوں امین آباد اور سیہ چانگ میں کی گئی الگ الگ کارروائیوں میں مزید 6 دہشت گرد مارے گئے۔ سیکیورٹی ذرائع نے بتایا کہ مارے گئے دہشت گردوں کے قبضے سے بھاری مقدار میں اسلحہ اور گولہ بارود بھی برآمد ہوا ہے۔ یہ کارروائیاں سکیورٹی فورسز کی طرف سے عسکریت پسندوں کے نیٹ ورک کو ختم کرنے اور متاثرہ علاقوں میں سکیورٹی بحال کرنے کی جاری کوششوں کا حصہ ہیں۔