اسلام آباد: نائب وزیراعظم اور وزیر خارجہ اسحاق ڈار نے ایرانی وزیر خارجہ عباس عراقچی سے ٹیلیفونک رابطہ کیا جس میں خطے کی تازہ ترین پیش رفت پر تبادلہ خیال کیا گیا۔ دفتر خارجہ کے مطابق دونوں وزرائے خارجہ نے حالیہ پیش رفت اور بدلتی ہوئی علاقائی صورتحال پر تبادلہ خیال کیا۔ اسحاق ڈار نے ترقی پذیر ممالک اور عالمی سپلائی چینز پر سمندری ٹریفک کے اثرات کو اجاگر کرتے ہوئے تجارتی جہازوں کے لیے توانائی کی بلاتعطل فراہمی اور محفوظ نیویگیشن کو یقینی بنانے کی اہمیت پر زور دیا۔ انہوں نے اس بات پر زور دیا کہ خطے میں امن و استحکام کو یقینی بنانے کے لیے مذاکرات اور سفارت کاری ہی واحد قابل عمل ذریعہ ہے۔ ترجمان دفتر خارجہ کے مطابق دونوں رہنماؤں نے قریبی رابطہ اور تعاون جاری رکھنے پر اتفاق کیا۔ انہوں نے اقوام متحدہ کی جنرل اسمبلی کے 81ویں اجلاس کے موقع پر نیویارک میں ملاقات پر بھی اتفاق کیا۔