اسلام آباد: وزیر اعظم شہباز شریف نے بدھ کو نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین لیفٹیننٹ جنرل انعام حیدر ملک سے ملاقات کی، جس میں ملک میں مون سون بارشوں کی تیاریوں پر تبادلہ خیال کیا گیا۔ ایکس پر ایک پوسٹ میں، وزیر اعظم آفس (پی ایم او) نے نوٹ کیا کہ وزیر اعظم شہباز نے چیئرمین کو صوبائی حکومتوں اور صوبائی ڈیزاسٹر مینجمنٹ اتھارٹیز کے ساتھ کوآرڈینیشن کے حوالے سے ہدایت کی، جس کے بارے میں ان کے بقول بارشوں کے دوران مزید بہتر کیا جانا چاہیے۔ پی ایم او کے مطابق وزیر اعظم شہباز کو ملک میں مون سون بارشوں کے دوران کسی بھی ہنگامی صورتحال سے متعلق تیاریوں پر بریفنگ دی گئی، وزیر اعظم نے قبل از وقت وارننگ سسٹم کو مکمل طور پر فعال کرنے میں پیش رفت اور اس سلسلے میں وزارت موسمیاتی تبدیلی کے ساتھ کوآرڈینیشن سے بھی آگاہ کیا۔ رواں ماہ کے اوائل میں ایک اجلاس میں وزیراعظم شہباز شریف نے فیڈرل ایمرجنسی رسپانس کمیٹی تشکیل دینے کا حکم دیا تھا۔ انہوں نے موسمیاتی تبدیلی کے وزیر مصدق ملک اور این ڈی ایم اے کے چیئرمین کو مون سون سیزن کی تیاریوں کا جائزہ لینے کے لیے تمام صوبوں، آزاد جموں و کشمیر (اے جے کے) اور گلگت بلتستان (جی بی) کے ہنگامی دورے کرنے کی بھی ہدایت کی تھی۔