اسلام آباد: صدر آصف علی زرداری نے صوبے میں امن اور ترقی کو یقینی بنانے کے لیے وفاقی اور بلوچستان حکومتوں کے درمیان موثر رابطوں کی ضرورت پر زور دیتے ہوئے کہا ہے کہ رقبے کے لحاظ سے پاکستان کا سب سے بڑا صوبہ خصوصی توجہ اور وسائل کا مستحق ہے۔ صدر نے ان خیالات کا اظہار وزیر اعلیٰ بلوچستان میر سرفراز بگٹی سے اسلام آباد میں ملاقات کے دوران کیا۔ وزیراعلیٰ نے انہیں صوبے کی مجموعی صورتحال اور جاری ترقیاتی اقدامات سے آگاہ کیا۔ ملاقات میں پیپلز پارٹی خواتین ونگ کی صدر فریال تالپور اور سابق صوبائی وزیر میر علی حسن زہری نے بھی شرکت کی۔ صدر زرداری نے کہا کہ دہشت گردوں کی طرف سے بلوچستان کی ترقی میں رکاوٹ ڈالنے کی تمام کوششوں کو ہر قیمت پر ناکام بنایا جائے گا۔ انہوں نے اس یقین کا اظہار کیا کہ وہ دن دور نہیں جب بلوچستان سے دہشت گردی کا مکمل خاتمہ ہو جائے گا، صوبے میں امن، استحکام اور ترقی کے لیے حکومت کے عزم کا اعادہ کیا گیا۔